विराटनगर । मोरङ प्रहरीको हिरासतमा विराटनगर रहेका एक जना थुनुवाको मृत्यु भएपछि घटनाको छानबिन गर्न सहायक प्रमुख जिल्ला अधिकारीको नेतृत्वमा पाँच सदस्य छानबिन समिति गठन भएको छ । मोरङका प्रमुख जिल्ला अधिकारी कोषहरी निराैलाको उपस्थितिमा सोमबार बसेको बैठकले सहायक प्रमुख जिल्ला अधिकारी शरद कुमार पोखरेलको नेतृत्वमा पाँच सदस्य छानबिन समिति गठन भएको हो ।
समितिमा १ नम्बर प्रदेश प्रहरी कार्यालय विराटनगरका डिएसपी, विराटनगर महानगरपालिका ११ का वडाध्यक्ष तिर्थेन्द्र न्यौपाने, १२ का वडाध्यक्ष हिरालाल कामत र वीरेन्द्र कुमार कार्कीसहितको छानबिन समिति गठन भएको मोरङ प्रहरीका प्रवक्ता डिएसपी दीपक श्रेष्ठले जानकारी दिए ।
थुनुवाको मृत्यु प्रकरणमा छानबिन समितिले छानबिन गरेर प्रतिवेदनको आधारमा दोषी देखिए प्रहरीमाथि कारबाही हुनेछ । प्रमुख जिल्ला अधिकारीको नेतृत्वमा बसेको बैठकले मृतक परिवारलाई क्षतिपूर्तिको लागि गृह मन्त्रालयमा सिफारिस गर्ने पनि निर्णय गरेको बुझिएको छ ।
शुक्रबार दिउँसो विराटनगर ११ बाट गाँजासहित पक्राउ परेका ३७ वर्षीय भीम कामतको आइतबार मृत्यु भएको थियो ।
कामतको मृत्यु भएको घटनालाई लिएर मृतकका आफन्तले रहस्य तरिकाले मृत्यु भएको भन्दै उच्च स्तरीय छानबिन समिति गठन गरिनुपर्ने, दोषी प्रहरीलाई कारबाही र मृतकका परिवार लाही क्षतिपूर्ति दिनुपर्ने माग राख्दै सोमबार प्रदर्शनमा उत्रिएका छन् । दिउँसो विराटनगरस्थित जिल्ला प्रशासन कार्यालय मोरङ अगाडी उनीहरूले सडकमा टायल बालेर विरोध प्रदर्शन गर्दै छानबिन समिति गठन गरी दोषी प्रहरीलाई काबाहीको माग राखेर प्रदर्शनमा उत्रिएको मृतका भाइ विरेन्द्र कामतले बताए ।
छानबिन समिति गठन भएपछि मृतक परिवारले पोस्टमार्टम गर्नको लागि प्रहरीमा जाहेरी दिने भएका छन् । जाहेरीपछि कोसी अस्पतालमा राखिएको कामतको शवको पोस्टमार्टम हुनेछ । पोस्माटमपछि परिवारले विधिगत रूपमा दाहसंस्कार गर्ने परिवारले जनाएको छ ।
