काठमाडौं । विद्यालय शिक्षा ऐन जारी गर्न माग राखेर शिक्षकहरूले बुधबारदेखि अनिश्चितकालीन आन्दोलन सुरु गरेका छन् ।
शिक्षकहरू माइतीघर मण्डलामा भेला भएर बिजुली बजार पुलसम्म प्रदर्शन गरेका थिए । हिउँदे अधिवेशनबाट विद्यालय शिक्षा विधेयक पारित गर्न दबाव दिन गत फागुन २४ गते शिक्षकहरूले काठमाडौं केन्द्रित प्रदर्शन गरेका थिए ।
आफ्ना माग पूरा नभएसम्म प्रदर्शन जारी राख्ने घोषणा गरेका छन् ।
एसईई परीक्षाको उत्तरपुस्तिका परीक्षण नगर्ने, सरकारले गर्ने कुनै कार्यक्रममा सहभागी नहुने, विद्यालयले लिएको कुनै पनि परीक्षाको उत्तरपुस्तिका परीक्षण नगर्ने, नजिता प्रकाशन नगर्ने उनीहरूले जनाएका छन् ।
उनीहरूले विद्यालय तहसम्मको अधिकार स्थानीय सरकार मातहत राख्न नहुने माग पनि राखेका छन् । शिक्षकको दरबन्दी केन्द्र सरकारअन्तर्गत हुनुपर्ने र शिक्षकको १० वर्षमा आवधिक बढुवा हुनुपर्ने पनि उनीहरूको माग रहेको छ ।
