झिलझिले / सामाजिक गतिविधिमा क्रियाशील संस्था गोर्खाली हर्टको आउँदो असोज १५ गते प्रथम अधिवेशन हुने भएको छ ।
झापाको शिवसताक्षी नगरपालिकामा विगत पाँच वर्षदेखि क्रियाशील हर्टले संस्थागत रूपमा दर्ता भएपश्चात् अधिवेशन गर्न लागेको तदर्थ समिति अध्यक्ष विजय खिम्दुङले जानकारी दिए । सतासी खबरपत्रिकाको कार्यालयमा आइतबार पत्रकार सम्मेलन गर्दै संस्था भदौ ६ गते जिल्ला प्रशासन कार्यालयमा दर्ता गरी सञ्चालन गरिएको खिम्दुङले जानकारी दिए । फेसबुक पेज बनाई हर्टले विपन्न परिवार, बाढी पीडित, क्यान्सर पीडित, उच्च शिक्षा अध्ययन गर्न आर्थिक अभाव भएकाहरूलाई सहयोग गर्दै आइरहेको छ ।
हर्टको फेसबुकमा ३५ हजारभन्दा बढी सदस्यहरू जोडिएका छन् । संस्थाले ताजा रगत आवश्यक परेका बेलामा तत्काल रगत दिने व्यवस्थाका लागि रक्तदाताको समूह तयार गरी सेवा दिने भएको छ । अधिवेशनको क्रममा झापा हल्दिबारी गाउँपालिका जलथलका ३४ वर्षीय वोनम्यारो पीडित उमेश राईलाई उपचार सहयोग उपलब्ध गराउने कार्यक्रम रहेको तदर्थ समितिका महासचिव योसा थेवेले जानकारी दिइन् ।
