पथरी । मोरङको कानेपोखरी गाउँपालिकाले ६२ जना भूमिहीन सुकुम्बासीलाई जग्गाको धनीपूर्जाको प्रमाणपत्र वितरण गरेको छ ।
बुधबार रमाइलो जनएकताको सभाहलमा भएको कार्यक्रममा भूमिहीन सुकुम्बासी र भूमिहीन दलित ६२ जनालाई जग्गाको धनीपुर्जा वितरण गरेको हो । कार्यक्रमको प्रमुख अतिथि भूमि व्यवस्था, सहकारी तथा गरिवि निवारण मन्त्री शशी श्रेष्ठ, कार्यक्रमका विशिष्टि अतिथि भूमि आयोग केन्द्रिय अध्यक्ष केशव निरौला र कार्यक्रमका सभाध्यक्ष कानेपोखरी गाउँपालिका अध्यक्ष राजमती इङ्नामले वितरण गरेका थिए ।
वडा नं. ६ का भूमिहीन सुकुम्बासी २७ जना र भूमिहीन दलित ९ जनाले जग्गाको धनीपुर्जा प्राप्त गरेका छन् । नेपाल अधिराज्यभरी कुनै पनि जग्गा नभएको भूमिहीन सुकुम्बासी र भूमिहीन दलितलाई १ कट्ठा देखी ५ कटठा सम्म जग्गा धनीपूर्जाको प्रमाणपत्र निशुल्क प्राप्त गर्ने व्यवस्था छ ।
सो व्यवस्था अनुसार ६ नंं. वडाको क ब्लकको क्षेत्रमा ६२ जना रहेको वडा नम्बर ६ का वडाध्यक्ष खड्ग बस्नेतले बताए । बाँकी २६ जनाले विराटनगर गएर हस्ताक्षर गरेपछि मात्र प्राप्त गर्ने कानेपोखरी गाउँपालिका उपाध्यक्ष भोला अधिकारीले बताए । हस्तारक्षर गर्न विराटनगर स्थित जिल्ला समन्वय समितिको कार्यालय भूमि आयोगमा जानुपर्ने भएकोले अन्य जान बाँकी रहेको गाउँपालिकाले जानकारी दिएका छन् ।
केपी शर्मा ओली प्रधानमन्त्री हुँदा भूमि आयोग केन्द्र र जिल्ला गठन गरेको थियो । जिल्लामा डिपी राई भूमि आयोग अध्यक्ष हुँदा मोरङमा पहिले कानेपोखरी गाउँपालिकामा २०७८ जेठ २१ गते यन्त्री विन्दु स्थापना गर्ने काम सुरु गरेका थिए । यन्त्री विन्दु स्थापना गर्ने काम सुरु भएसँगै पूर्व गाउँपालिका अध्यक्ष ताराबहादुर काफ्लेको टिमले तिब्र गतीमा काम सुरु गरेका थिए । उस बेला गाउँपालिकाले सुकुम्बासीको समस्या हल गर्न प्राविधि खर्च ३६ लाख बजेट विनियोजन गरेका थिए । अहिले सम्म गाउँपालिकाले सुकुम्बासी समस्या हल गर्न प्राविधि खर्च ४५ लाख भन्दा बढी खर्च गरिसकेको वडा नं. ६ का अध्यक्ष खड्ग बस्नेतले बताए ।
कार्यक्रममा पूर्व गाउँपालिका अध्यक्ष तारा बहादुर काफ्लेले, प्रमुख जिल्ला अधिकारी काशिराज दाहाल, भूमि आयोग जिल्ला अध्यक्ष सुशिला घिमिरे, भूमि आयोग केन्द्रिय उपाध्यक्ष नहेन्द्र खड्का, भूमि आयोग केन्द्रिय अध्यक्ष केशव निरौला र भूमि व्यवस्था, सहकारी तथा गरिवि निवारण मन्त्री शशी श्रेष्ठले शुभकामना मन्तव्य राखेका थिए ।
गाउँपालिका अध्यक्ष राजमती इङ्नामको सभाध्यक्षमा भएको कार्यक्रममा गाउँपालिका उपाध्यक्षको स्वागत मन्तव्य रहेको थियो भने कार्यक्रम प्रमुख प्रशासकीय अधिकृत सन्तोष घिमिरेले संचालन गरेका थिए ।
