धरान । पार्टीलाई अन्तरघात गरेको भन्दै अनुशासन समितिमा कारबाहीको सिफारिस गरिएका व्यक्तिलाई नै नेपाली काङ्ग्रेस जिल्ला समिति सदस्यमा मनोनित गरेपछि धरान–६ वडा समितिमा खैलाबैला मच्चिएको छ ।
नेपाली काङ्ग्रेस धरान–६ नम्बर वडा समितिले गएको निर्वाचनमा पार्टीलाई अन्तरघात गरी हराउनमा भूमिका खेलेका शालिग्राम आचार्यलाई जिल्लाले एकाएक सदस्यमा मनोनित गरेपछि काङ्ग्रेसभित्र चर्चाको विषय बनेको हो । पार्टी सभापति केदार भण्डारीले परिवर्तनशील समाज नेपाल र बीपी कोइराला सङ्ग्रहालय एवम् अनुसन्धान केन्द्र धरानले गरेको कार्यक्रमलाई सम्बोधन गर्ने क्रममा आफ्नो हस्ताक्षर दुरुपयोग गरेकाले छानबिन गरेर कारबाही गर्ने कुरा बताएका थिए । जिल्ला सभापतिको मन्तव्यबारे जानकार क्षेत्रीय सभापति सुजेन्द्र गोले तामाङले भने, ‘सभापतिज्यूले मनोनयनको सन्दर्भमा हस्ताक्षर दुरुपयोग भएको भनेर बोल्नुभयो । को सदस्य भन्ने चाहिँ खुलेन । अलि अमूक कुरा गर्नुभयो ।’
वडा सभापति वीरबहादुर कार्कीले भदौ २३ गते जारी गरेको विज्ञप्तिमा पनि कीर्ते हस्ताक्षर भएको उल्लेख गरेका छन् । विज्ञप्तिमा भनिएको छ, ‘शालिग्राम आचार्यको जिल्ला समिति सदस्य मनोनित पत्रमा नक्कली तथा कीर्ते हस्ताक्षर गरिएको भनी जिल्ला कार्य समिति सभापति केदार भण्डारी, प्रदेश १ महामन्त्री उमेश थापा, तथा क्षेत्रीय सभापति सुजेन्द्र गोले तामाङलगायत अग्रज नेतागणबाट मौखिक जानकारी प्राप्त भएकाले उक्त मनोनित पत्र लिनुहुने शालिग्राम आचार्यको मनोनित पत्र आधिकारिक नभएको सम्पूर्ण नेपाली काङ्ग्रेस समर्थक नेता, कार्यकर्तामाझ जानकारी गराउँदछौँ ।’
जिल्ला सभापति भण्डारीले भदौ ३ गते मनोनित गरेको पत्र भदौ २१ गते क्षेत्रीय प्रतिनिधि पूर्ण सुवेदीले हस्तान्तरण गर्दै गरेको सामाजिक सञ्जाल फेसबुकमा बाहिरिएको थियो । फेसबुकमा उक्त कुरा बाहिरिएपछि वडा समितिमा भाँडभैलो सुरु भएको हो । २१ गते मात्रै पत्र प्राप्त गरेका मनोनित जिल्ला सदस्य आचार्यले भने, ‘जसले गरेको छ, सल्लाहअनुसार नै गरेको छ । बीचमा के कति कुरा भए त्यो मलाई थाहा छैन ।’ गएको स्थानीय तहको निर्वाचनमा हाल निर्वाचित वडाध्यक्ष भूपेन्द्र भट्टराईलाई सहयोग गरी पार्टीका उम्मेदवारलाई हराएको भन्दै धरान–६ नम्बर वडा समितिका अध्यक्ष वीरबहादुर कार्कीले जिल्ला अनुशासन समितिलाई कारबाहीका लागि सिफारिस गरेका थिए । अध्यक्ष कार्कीले भने, ‘हामीले कारबाहीका लागि सिफारिस गरेका व्यक्तिलाई नै जिल्लाले सदस्यमा मनोनित गरेको खबर पाइयो । राम्ररी बुझ्दा सभापति केदार भण्डारीको हस्ताक्षर चाहिँ कीर्ते गरिएको रहेछ ।’
आचार्यलाई नेपाली काङ्ग्रेसको विधान २०१७ (संशोधन र परिमार्जन २०७५) परिच्छेद ३ को धारा ५ (ख) २ ले दिएको अधिकार बमोजिम पार्टीको जिल्ला सदस्यमा मनोनित गरिएको पत्र दिइएको छ । जसमा जिल्ला सभापति केदार भण्डारीले हस्ताक्षर गरेका छन् । यसबारे सभापति भण्डारीलाई फोनसम्पर्कमा बुझ्दा हस्ताक्षरबारे थप कुरा बताएनन् । तर, उनले भने, ‘कारबाही भएको मान्छे भन्ने कुरा मसामु आइसकेको छ । अनुसन्धान भइरहेको छ, के छ, हेरेर कुरा गर्छु ।’ यता धरान–६ का सभापति कार्कीले जारी गरेको विज्ञप्तिमा पार्टीले साधारण सदस्यसमेत नरहने गरी कारबाही गरेको उल्लेख गरेका छन् । जिल्ला सदस्यमा मनोनित भएको भनी क्षेत्रीय प्रतिनिधि पूर्ण सुवेदीले सामाजिक सञ्जाल फेसबुकमा पोष्ट गरेकाले उनीमाथि पनि छानबिन गर्न वडा समितिले माग गरेको छ । क्षेत्रीय प्रतिनिधि पूर्ण सुवेदीले पत्र चाहिँ आधिकारिक भएको दाबी गरे । उनले कसैलाई पनि कारबाही नभएको बताए । उनले आफूलाई कारबाही गर्ने अधिकार कसैलाई नभएको बताए ।
मनोनित सदस्य आचार्यले ब्लाष्टकर्मीसँगको फोनसम्पर्कमा भने, ‘मलाई कारबाही केही भएको छैन । कल्ले, कल्लाई कारबाही गर्ने ? उनीहरूले मलाई काङ्ग्रेस बनाएको पनि हैन ।’ आफूले यसो गरिदिनु प¥यो; उसो गरिदिनुप¥यो भनेर नभएको उनले बताए । ‘नबनाएको भए पनि केही आपत्ति थिएन, फिर्ता लिन्छन् भने पनि केही आपत्ति छैन । नातावाद, कृपावादमा अल्झिने मान्छे होइन; काङ्ग्रेसमै बसिरहनु पर्छ भन्ने पनि छैन’–उनले चुनौती दिँदै भने । यता क्षेत्रीय सभापति सुजेन्द्र गोले तामाङले भने, ‘वडाबाट कारबाहीका लागि सिफारिस भएको सत्य हो । वडा हुँदै जिल्लासम्म पुगेको थियो । क्षेत्रीय समितिलाई बोधार्थ दिइएको थियो ।’
नेपाली काङ्ग्रेसको विधानमा कारबाही गर्ने अधिकार केन्द्रीय समितिलाई मात्रै छ । केन्द्रीय अनुशासन समितिमा कारबाहीका लागि सिफारिस भएको अवस्थामा जाँचबुझ गरेर कारबाही गरिने व्यवस्था छ । जिल्ला अनुशासन समितिलाई जाँचबुझ गर्ने, स्पष्टीकरण सोध्ने, सफाइको मौका दिनेसम्मको अधिकार छ । जाँचबुझपश्चात् प्रदेश १ समितिको अनुशासन समितिलाई सिफारिस गर्ने, प्रदेशले केन्द्रको अनुशासन समितिलाई सिफारिस गर्ने व्यवस्था रहेको छ ।
