विराटनगर । प्रदेश १ का मुख्य सहरहरू अवैध लागूऔषध सप्लाइ गर्दै आएका गिरोहको मुख्य नाइकेलाई प्रहरीले झण्डै २० केजी गाँजासहित पक्राउ गरेको छ । पूर्वी सहरमा मात्र नभएर भारतसम्म गाँजाको कारोबार गर्ने मुख्य गिरोह मोरङका बेलबारी नगरपालिका १ का २३ वर्षिय सन्तोष राईसहित तीन जनलाई प्रहरीले पक्राउ गरेको हो ।
पक्राउ परेका गिरोहको सञ्जालले बेलबारी नगरपालिका भित्रका होटल संचालन गरि अवैध लागूऔषधको कारोबार पनि गर्ने गरेको प्रहरीले तथ्य फेला पारेको छ ।
इलका प्रहरी कार्यालय बेलबारीका प्रहरी निरीक्षक सरोज खनालको नेतृत्वमा खटिएको प्रहरी टोलीलले अवैध गाँजाको कारोबारी गर्ने बेलबारी १ का ३२ वर्षिय ज्ञानबहादुर राई र धनकुटाका २६ वर्षिय महेश्वर राईलाई मंगलबार १९ केजी ६ सय ५० ग्राम गाँजासहित पक्राउ गरेपछि यस्तो तथ्य बाहिर आएको हो । पक्राउ परेका मध्ये मुख्य कारोबारी सन्तोष रहेको खुलेको छ ।
सन्तोष र ज्ञानबहादुर दाजुभाइ हुन् । दाजु ज्ञानबहादुरको बेलबारीमा ग्रिन कटेज नाम रहेको होटल रहेको छ । उक्त होटलमा गाँजाको गोप्य रूपमा कारोबार हुने गरेको प्रहरीको प्रराम्भिक चरणको अनुसन्धानदेखि खुलेको छ । भाइ सन्तोषले दाजु ज्ञानबहादुरालाई गाँजा दिने र कुलतमा लागेकाहरूलाई बिक्री वितरण गर्ने गरेको मोरङ प्रहरीका प्रवक्ता डिएसी दिपक श्रेष्ठले जानकारी दिए ।
पक्राउ परेका तीन जनालाई लागूऔषध मुद्दामा म्याद थप गरि अहिले अनुसन्धान गर्दै आएको उनले जानकारी दिए ।
सन्तोषले माग अनुसार पूर्वी सहरमा मात्र नभएर भारतसम्म गाँजा सप्लाइ गर्ने गरेको बुझिएको छ । पक्राउ परेका मध्ये महेश्वरले सन्तोषले मगाएको गाँजा ल्याइदिने गरेको कारणले प्रहरीले उनलाई पक्राउ गरेको मोरङ प्रहरीले जनाएको छ । ‘जतिपनि पूर्वी सहरमा गाँजाको माग हुन्छ । सन्तोषले राम्रो पैसाँ लिएर पुर्याउने गरेको खुलेको छ,’ अनुसन्धानमा संलग्न एक प्रहरी अधिकारीले भने ।
प्रहरीका अनुसार महेश्वरले प्रतिकेजी १० हजारमा धनकुटादेखि खरिद गरेको गाँजा सन्तोषले तराइमा ल्याएपछि २० देखि २५ हजार केजीसम्म बिक्री गर्ने गरेका छन् । सन्तोषले ठूलो परिमाणमा खरिद गर्नेलाई बिक्री गर्दै आएका थिए भने दाजु ज्ञानबहादुरले खुद्रामा होटलमार्फत प्रयोगकर्ताहरूलाई गाँजा बिक्री गर्दै आएका थिए ।
प्रयोगकर्ताहरुलाई ज्ञानबहादुरले ग्रामको प्याकेट बनाएर बिक्री गर्दै आएको प्रहरीले जनाएको छ । उनले होटलदेखि १ सय ग्रामदेखि २ सय ग्रामसम्मको प्याकेट बनाउने गरेका थिए । उनले प्रयोगकर्ताहरुलाई प्रतिग्राम २ सय देखि ३ तीन सय रुपैयाँसम्म बिक्री गर्दै आएको सुरक्षास्रोतले जानकारी दिएको छ ।
