घरमै भरूवा बन्दुक बनाउने कारखाना सञ्चालन गरेका बेलबारीका एक जना पक्राउ परेका छन् ।

पक्राउ पर्नेमा बेलबारी नगरपालिका १ का ५२ वर्षीय  आश बहादुर लिम्बु रहेका  जिल्ला प्रहरी कार्यालय मोरङले जनाएको छ । कार्यालयका अनुसार कारखाना सञ्चालन गरी भरुवा बन्दुक  बनाई बेचबिखन गर्ने गरेको सूचनाका आधारमा लिम्बूको घरमा इलाका प्रहरी कार्यालय बेलबारीबाट खटिएको प्रहरी टोलीले लिम्बूको घरमा छापा मारेको थियो । 

प्रहरीले छापा मार्ने क्रममा लिम्बूको घरबाट भरुवा बन्दुक १ थान, बन्दुक बनाउन प्रयोग गरिने नाल २ थान, काठको बट ४ थान, फलामको पड्किने पासो भएको बन्दुक १ थान, बारुद १ केजी, हरिणको सिङ ५ थान, बन्दुकको नाल सफा गर्ने रड १ थान त्यस्तै फलामको काँजो ३ थान लगायत बन्दुक बनाउन प्रयोग हुने औजार बरामद गरेको कार्यालयले जनाएको छ । 

बरामद गरिएका सामना सहित पक्राउ परेका लिम्बु माथि थप अनुसन्धान भइरहेको  कार्यालयले जनाएको छ ।