सुनसरी । सुनसरी प्रहरीले २०४७ सालपछि पहिलोपटक जिल्लाको दक्षिणवर्ती सीमा क्षेत्रमा इन्स्पेक्टरको कमाण्डमा प्रहरी टोली खटाएको छ ।
सीमामा पर्ने देवानगञ्ज गाउँपालिकामा नवनिर्मित इलाका प्रहरी कार्यालयको भवनबाट बुधबारदेखि इन्स्पेक्टरको कमाण्डमा सेवा सुरु गरिएको छ । भारतसँग नाका जोडिएको सुनसरी जिल्लाको सीमावर्ती क्षेत्रमा बेलाबखत हुँदै आएका आपराधिक गतिविधि र चोरीपैठारी नियन्त्रण गर्ने योजना अन्तर्गत इन्स्पेक्टरको कमाण्डमा सीमामा प्रहरी टोली खटाइएको जिल्ला प्रहरी कार्यालय सुनसरीले जनाएको छ । इलाका प्रहरी कार्यालय देवानगञ्जमा जिल्ला प्रहरी कार्यालय सुनसरीले इन्स्पेक्टर बद्री दाहाललाई काजमा खटाएको छ ।
भारतबाट सुनसरी जिल्लाको विभिन्न नाका हुँदै भिœयाइने हातहतियारको आडमा हत्या, अपहरण, चन्दा तथा फिरौती असुली, लुटपाटलगायतका आपराधिक घटना हुने गरेको छ । पछिल्लो समयमा विप्लवलगायत समूहका गतिविधि कमजोर हुँदै गए पनि बेलाबखत सुनसरीको सीमावर्ती क्षेत्रमा आपराधिक समूह र प्रहरीबीच गोली हानाहान र साना हतियार बरामद हुँदा अवैधानिक रूपमा हातहतियारको कारोबार हुने गरेको अनुमान गर्न सकिन्छ ।
२०७७ साल साउन १ गते अन्दाजी पौने ९ बजेको समयमा जिल्ला प्रहरी कार्यालय सुनसरीबाट इन्स्पेक्टर सरोज खनाल नेतृत्वको प्रहरीको गस्ती टोली र आपराधिक समूहबीच गोली हानाहान भयो । सुनसरी जिल्ला देवानगञ्ज–३ पानीट्याङ्की नजिक भारतीय मोटरसाइकलमा आएका व्यक्तिहरूलाई चेकजाँच गर्न खोज्दा देवानगञ्ज–२ बस्ने वर्ष २३ का पिन्टु यादव, सोही स्थानका ३२ वर्षीय राजेश यादव र अन्य ३–४ जनाको समूहले प्रहरीमाथि फायर खोली भाग्ने क्रममा प्रहरीले जवाफी फायर खोल्दा निज पिन्टु यादव र राजेश यादवको खुट्टामा गोली लागेर घाइते भएका थिए । त्यतिबेला प्रहरीले घटनास्थलबाट एक थान पेस्तोल, ६ राउण्ड गोली र २ थान म्यागजिनका साथै दुईवटा मोटरसाइकल बरामद गरेको थियो ।
जिल्ला प्रशासन कार्यालयबाट इजाजतपत्र नलिई हातहतियारको कारोबार गर्नु गैरकानूनी मानिन्छ । खुला सीमा नाकाका कारण विभिन्न समयमा हातहतियार ओसार–पसार हुने गरेको बताउँदै जिल्ला प्रहरी कार्यालय सुनसरीका एसपी सञ्जयसिंह थापाले सुरक्षा दृष्टिकोणले हातहतियार चुनौतीको रूपमा देखिएको हुँदा त्यस्ता आपराधिक गतिविधि नियन्त्रण गर्ने योजना रहेको बताए । ‘विगतमा खासगरी चोरी डकैती, लुटपाट,अपहरण जस्ता गैरकानूनी क्रियाकलाप गर्ने उद्देश्यले हातहतियार प्रयोग गरिने क्रम बढेको देखिन्छ’ उनले भने, ‘नेपाल प्रहरीको अनुसन्धानले समेत त्यही देखाएको छ ।’
त्यस्ता गतिविधि नियन्त्रण गर्न नेपाल प्रहरीले निगरानी बढाएकाले हातहतियारको तस्करी गर्ने समूह पक्राउ पर्न थालेको एसपी थापाको भनाइ छ । सीमावर्ती क्षेत्रमा विगतको भन्दा जनशक्तिसमेत थप गरिएको छ । विगतमा असइको नेतृत्व रहेको इलाका प्रहरी कार्यालय देवानगञ्जमा १२ जना जनशक्तिलाई बढाएर अहिले २४ पुर्याइएको छ ।
‘३१ वर्षपछि सीमा क्षेत्रमा इन्स्पेक्टरको कमाण्डमा प्रहरी टोली खटाइएको छ’ एसपी थापाले भने, ‘जनशक्ति थप भएपछि सीमा क्षेत्रमा हुने चोरीपैठारी, सीमा अपराध तथा घरेलु हिंसाका घटनामा कमी आउने विश्वास छ ।’
