धरान । अमेरिकी पेस्तोलसहित मोरङको कानेपोखरी गाउँपालिका–६ बाट दुई युवालाई प्रहरीले पक्राउ गरेको छ ।
पेस्तोलसहित तीन राउण्ड गोली र एक थान खुकुरीसमेत कानेपोखरी–६ शिवालयचोकका ३० वर्षीय रुद्रबहादुर क्षेत्रीलाई पक्राउ गरिएको हो । क्षेत्रीले घरमा लुकाई छिपाई राखेको अवस्थामा पेस्तोल र गोली प्रहरीले नियन्त्रणमा लिन सफल भएको हो ।
जिल्ला प्रहरी कार्यालय मोरङका प्रवक्ता डिएसपी दीपक श्रेष्ठका अनुसार प्रारम्भिक अनुसन्धानपश्चात् उक्त घटनामा सोही ठाउँका ४० वर्षीय पूर्णबहादुर बोहोराको पनि संलग्नता देखिएपछि उनलाई पनि पक्राउ गरिएको छ । उनीहरूलाई हातहतियार खरखजाना कसुरमा पाँच दिनको म्याद थप गरी अनुसन्धान अगाडि बढाइएको प्रहरीले जनाएको छ ।
अस्पतालका बिचौलिया थप पक्राउ
विराटनगरमा उपचार गराउन आउने बिरामीलाई प्रलोभनमा पार्दै विभिन्न अस्पतालमा लानेहरूलाई पक्राउ गर्ने क्रममा मोरङ प्रहरीले थप पाँचजनालाई पक्राउ गरेको छ ।
बिरामीका आफन्तलाई झुक्याई विभिन्न अस्पतालमा लान खोजेको आरोपमा पक्राउ गरिएको मोरङका डिएसपी दीपक श्रेष्ठले जानकारी दिए । प्रहरीका अनुसार विराटनगर–८ का २१ वर्षीय सुनिल राय, विराटनगर–११ का २२ वर्षीय रोहित साह, सोही ठाउँका २० वर्षीय विवेक साह, सुनसरी इनरुवा नगरपालिका–१ का २० वर्षीय विनोद मेहता र सप्तरी राजविराज–९ का २३ वर्षीय सारन्सकुमार चौधरीलाई पक्राउ गरिएको छ । उनीहरूलाई अभद्र व्यवहारमा मुद्दा दर्ता गरिएको छ ।
ट्याङ्कर चोरीमा संलग्न दुई पक्राउ
२० हजार लिटर डिजेलसहितको ना.४ ख ४६९ नम्बरको ट्याङ्कर चोरी गरी लाँदै गर्दा जिल्ला प्रहरी कार्यालय मोरङले बूढीगङ्गा गाउँपालिका–३ बाँसबारीबाट दुईजनालाई पक्राउ गरेको छ ।
विराटनगर–४ का २६ वर्षीय श्रवणकुमार यादव र २६ वर्षीय विक्की रायलाई पक्राउ गरिएको हो । उनीहरूलाई नेपाल आयल निगमको उत्तरतर्फको पार्किङ स्थलमा राखिएको ट्याङ्कर चोरी गरी लिएर जाँदै गरेको अवस्थामा नियन्त्रणमा लिइएको हो । उनीहरूलाई चोरी मुद्दामा पाँच दिनको म्याद थप गरी अनुसन्धान अगाडि बढाइएको प्रहरीले जनाएको छ ।
