धनकुटा । स्वास्थ्य उपचार गराउन आएका बिरामीलाई अप्राकृतिक मैथुन गरेको अभियोगमा पक्राउ परेका डा. राज शर्मा ५० हजार धरौटीमा शुक्रबार रिहा भएका छन् ।
धनकुटा–७ स्थित परिचयमोडमा रहेको सुवास मेडिकलमा कार्यरत उनलाई प्रहरीले साउन २४ गते बिहान पक्राउ गरेको थियो । धनकुटाको पाख्रीबास घर भएका ५३ वर्षीय बिरामीले आफूलाई डा.शर्माले मध्यराति मादक पदार्थ सेवन गरेर यौन दुव्र्यवहार गरेको किटानी जाहेरी दिएपछि उनी पक्राउ परेका थिए ।
पीडित बिरामीले मुलुकी फौजदारी संहिताको व्यवस्थाअनुसार जाहेरी दिएकाले फौजदारी प्रक्रियामा ५० हजार धरौटीमा छुटेको प्रमुख जिल्ला अधिकारी कृष्णप्रसाद पन्थले जानकारी दिए ।
सार्वजनिक स्थानमा अप्राकृतिक मैथुन गरेको अभियोग अनुसन्धानको क्रममा रहेको र टुङ्गो लागिनसकेकाले १ महिने तारिखमा छोडिएको प्रजिअ पन्थले बताए । उनले दुनियावादी फौजदारी मुद्दामा पीडित आफै अदालत जान सक्ने कानूनी व्यवस्था भए पनि प्रहरीमार्फत् पीडितले जाहेरी दिएकाले आवश्यक अनुसन्धान भइरहेको बताए ।
अभियोग प्रमाणित भए १ वर्षसम्म कैद र १० हजारसम्म जरिबाना हुने कानूनी व्यवस्था छ । विराटनगर महानगरपालिका वडा नं. १२ खरैया घर भएका डा. शर्मा ४–५ वर्षदेखि धनकुटामा निजी स्रोतबाट सञ्चालित सुवास मेडिकल हलमा चिकित्सकका रूपमा कार्यरत रहेका थिए ।
