बिर्तामोड । कोरोना संक्रमणको जोखिम बढेपछि एकपछि अर्को गर्दै झापाका पालिकाहरुले आ–आफ्नो क्षेत्र सिल गर्न थालेका छन् ।
जिल्लाका दमक, बिर्तामोड, कनकाई, बुद्धशान्ति, शिवसताक्षी, गौरादहले आ–आफ्नो क्षेत्र सिल गर्ने निर्णय गरिसकेका छन् । पालिकाले गरेको सिललाई जिल्ला प्रशासन कार्यालयले अनुमोदन गरिसकेको छ ।
डिसीसीएमसीको बैठकले कोरोनाको जोखिम हेरेर सिल गर्न पाउने अधिकार पालिकाहरुलाई प्रदान गरेको छ । ‘हामीसँग समन्वय गरेर पालिकाहरुले त्यस्तो निर्णय गरेका छन्’ प्रमुख जिल्ला अधिकारी श्रवणकुमार तिमिल्सिनाले भने,‘आएका सिफारिसलाई हामीले अनुमोदन गर्ने गरेका छौं ।’
उल्लेखित पालिकाबाहेक अन्यले पनि सिल गर्ने तयारी गरेका छन् । अर्जुनधारा र मेचीनगरलगायतले सिल गर्ने तयारी गरेका हुन् । त्यस्तै अन्य पालिकाका केही वडाहरुले पनि सिल गर्ने निर्णय गरेको प्रजिअ तिमिल्सिनाले बताए ।
