धरान /सुनसरी इनरुवा नगरपालिका–१० जल्पापुरका मिर्गौला पीडित परिवारले सहयोगको याचना गरेका छन् ।
पीडित सन्तोषकुमार खत्वेको परिवारले उपचारका लागि सहयोगको याचना गरेका हुन् । पाँच वर्षदेखि अस्वस्थ खत्वेको मिर्गौलामा समस्या देखिएको थियो ।
उनको उपचार भइरहे पनि आर्थिक अभावका कारण थप उपचार गर्न असम्भव भएको पीडित परिवारले जनाएको छ । उनको पत्नी सुनिताकुमारी शर्मा खत्वेले पतिलाई बचाइदिन आग्रह गरिन् । हाल उनको उपचार विराटनगरको नोबेल अस्पतालमा भइरहेको छ ।
उनको उपचारमा करिब १ लाख रुपैयाँ तिर्न बाँकी रहेको बताइन्छ । अहिले उनलाई डायलाइसिस गरिरहनु परेको छ । उनको पतिको उपचारका लागि इनरुवा नगरपालिकाले विपन्न नागरिक औषधि उपचार सिफारिस समितिको बैठकले सहुलियत प्रदान गरिदिन नोबेललाई सिफारिस गरेको थियो । तर, उक्त सिफारिसअनुसार रकम पनि अपर्याप्त भएको पत्नी शर्माले बताइन् ।
