सुनसरी । मङ्सिर ४ गते हुन गइरहेको प्रतिनिधि र प्रदेशसभा सदस्य निर्वाचनका लागि सुनसरीमा दुई सयभन्दा बढी उम्मेदवारहरूले मनोनयन दर्ता गराएका छन् ।
यसपटकको आम निर्वाचनमा सत्ता गठबन्धनतर्फ नेपाली काङ्ग्रेस, नेकपा (माओवादी केन्द्र), नेकपा (एस) र जनमोर्चा पार्टी मिलेर चुनावी मैदानमा छन् भने अर्कोतर्फ वर्तमान शेरबहादुर देउवा सरकारमा सहभागी उपेन्द्र यादव नेतृत्वको जनता समाजवादी पार्टी नेपाल, राष्ट्रिय प्रजातन्त्र पार्टी नेपालसहितका राजनीतिक दलसँग चुनावी तालमेल गरी नेकपा (एमाले) चुनावमा होमिएको छ ।
चारवटा क्षेत्र रहेको सुनसरीमा २०७४ सालमा सम्पन्न प्रतिनिधिसभातर्फ नेपाली काङ्ग्रेसले क्षेत्र नम्बर २, ३ र ४ जितेको थियो भने क्षेत्र नम्बर १ मा तत्कालीन बाम गठबन्धनले जितेको थियो । गठबन्धन वा चुनावी तालमेल गरिए पनि यसपटक सुनसरीमा नेपाली काङ्ग्रेस र नेकपा (एमाले)का उम्मेदवारबीच नै कडा प्रतिस्पर्धा हुने देखिएको छ ।
२०७४ सालको प्रतिनिधिसभा सदस्य निर्वाचनमा सुनसरी क्षेत्र नम्बर १ बाट तत्कालीन बाम गठबन्धनका उम्मेदवार जयकुमार राई, क्षेत्र नम्बर २ बाट सीताराम मेहता, क्षेत्र नम्बर ३ बाट विजयकुमार गच्छदार र क्षेत्र नम्बर ४ बाट ज्ञानेन्द्रबहादुर कार्की विजयी भएका थिए भने उनीहरूमध्ये राईबाहेक अन्य तीनैजनाले पुनः उम्मेदवारी दिएका छन् ।
क्षेत्र नम्बर १ मा स्वतन्त्रको चुनौती
अघिल्लो निर्वाचनमा नेपाली काङ्ग्रेस पार्टीको समर्थनमा सुनसरी क्षेत्र नम्बर १ बाट उम्मेदवार बनेका जनता समाजवादी पार्टीका सङ्घीय अध्यक्ष अशोक राई यसपटक नेकपा (एमाले)को समर्थनमा उम्मेदवार बनेका छन् भने सत्तारुढ गठबन्धनबाट माओवादी केन्द्रका मुक्सामहाङ मेन्याङ्बो चुनावी मैदानमा छन् । यही क्षेत्रमा धरानका पूर्व प्रमुख तथा नेकपा (एमाले)का बागी उम्मेदवार मनोजकुमार मेन्याङ्बोको पनि उम्मेदवारी रहेको छ । त्यस्तै अर्का स्वतन्त्र उम्मेदवार नेपाल बसोबास बस्ती संरक्षण समाजका केन्द्रीय अध्यक्ष कुमार कार्की पनि मैदानमा छन् । सुनसरी १ मा प्रतिनिधिसभातर्फ २० जनाले मनोनयन दर्ता गराएका छन् भने प्रदेशसभा (क) तर्फ १५ जना र (ख) तर्फ १४ जना गरी जम्मा ४९ जनाले उम्मेदवारी दिएका छन् ।
२ मा मेहता भर्सेस आचार्य
२०७० सालको संविधानसभा र २०७४ सालमा सम्पन्न प्रतिनिधिसभा सदस्य निर्वाचनमा सुनसरी क्षेत्र नम्बर २ बाट निर्वाचित भएका नेपाली काङ्ग्रेसका उम्मेदवार सीताराम मेहता र नेकपा (एमाले)का उम्मेदवार भीम आचार्यबीच प्रतिस्पर्धा हुँदै छ । सुनसरी क्षेत्र नम्बर २ मा प्रतिनिधिसभा सदस्य पदको लागि काङ्ग्रेसबाट राजीव कोइराला र राजीव ढुङ्गानाको नाम चर्चामा रहे पनि मनोनयन दर्ताको अन्तिम समयमा मेहताले टिकट पाएका थिए भने नेकपा (एमाले)बाट उम्मेदवारी दिएका आचार्य १ नम्बर प्रदेशका पूर्व मुख्यमन्त्री हुन् । मेहताले पुनः उम्मेदवारी दिएका छन् । उनीहरूसँगै क्षेत्र नम्बर २ मा प्रतिनिधिसभातर्फ २७ जनाले उम्मेदवारी दिएका छन् भने प्रदेशसभा (क) तर्फ २० जना र (ख) तर्फ १० जना गरी जम्मा ५७ जनाले उम्मेदवारी दिएका छन् ।
गच्छदारलाई विरासत जोगाउन हम्मेहम्मे
२०७० सालको संविधानसभा र गत प्रतिनिधिसभा निर्वाचनमा झिनो मतले विजयकुमार गच्छदारसँग पराजित भएकी नेकपा (एमाले)की उम्मेदवार भगवती चौधरीबीच सुनसरी क्षेत्र नम्बर ३ मा कडा प्रतिस्पर्धा हुने देखिएको छ । नेपाली काङ्ग्रेस पार्टीका पूर्व उपसभापतिसमेत रहेका गच्छदारलाई यसपटक विरासत जोगाउन सजिलो नहुने स्थानीय बताउँछन् ।
नेपाली काङ्ग्रेसको १४ औं महाधिवेशनमा उपसभापतिमा पराजित भएका गच्छदार बालुवाटार जग्गा प्रकरणमा मुछिएका कारण उनको लोकप्रियतामा कमी आएकोले मङ्सिर ४ गते हुने निर्वाचनमा विरासत यथावत् राख्न गच्छदारलाई सजिलो नहुने एक काङ्ग्रेसी नेताले बताए । २०४८ सालयता निरन्तर सत्ता र शक्तिमा रहँदै आएका गच्छदार नेपाली काङ्ग्रेसबाट २०४८ सालमा सांसद् हुँदै सञ्चार राज्यमन्त्री भएका थिए भने हालसम्म उनले १२ पटक विभिन्न मन्त्रालयको जिम्मेवारी सम्हालिसकेका छन् । उनी सुनसरीबाट २०४८, ०५१ र २०५६ को संसदीय चुनाव, २०६४ र ०७० सालको संविधानसभा र २०७४ सालमा प्रतिनिधिसभाको सांसद्मा विजयी भएका व्यक्ति हुन् ।
काङ्ग्रेसबाट राजनीतिमा उदाएका गच्छदारले २०६४ सालमा तत्कालीन मधेसी जनअधिकार फोरम र २०७० सालमा फोरम लोकतान्त्रिकबाट चुनाव जितेका थिए भने गत निर्वाचनमा काङ्ग्रेसबाट उम्मेदवार भई सुनसरी ३ बाट सङ्घीय सांसद् बनेका थिए । यस्तै २०७० सालको संविधानसभा र २०७४ सालको प्रतिनिधिसभा सदस्यमा पदमा दुईपटक गच्छदारसँग झिनो मतान्तरले पराजित नेकपा (एमाले) नेतृ भगवती चौधरीले सुनसरी क्षेत्र नम्बर ३ मा प्रतिनिधिसभा सदस्यको लागि उम्मेदवारी दर्ता गराएकी छन् ।
बहालवाला मन्त्रीलाई कुशियैतको चुनौती
गत निर्वाचनमा सुनसरी क्षेत्र नम्बर ४ बाट निर्वाचित भएका नेपाली काङ्ग्रेसका नेता ज्ञानेन्द्रबहादुर कार्की र नेकपा (एमाले)का जगदीश कुशियैतबीच यसपटक भिडन्त हुँदै छ ।
सूचना, सञ्चार तथा प्रविधि मन्त्रालयसँगै वर्तमान शेरबहादुर देउवा सरकारको प्रवक्ताको जिम्मेवारीमा रहेका कार्की २०७४ सालमा सम्पन्न प्रतिनिधिसभा सदस्य निर्वाचनमा तत्कालीन बाम गठबन्धनका उम्मेदवारलाई पराजित गरेका थिए भने कुशियैत सुनसरी क्षेत्र नम्बर ४ (क) बाट प्रदेशसभा सदस्य पदमा निर्वाचित भई शेरधन राई नेतृत्वको सरकारमा १ नम्बर प्रदेशको उद्योग, वन, पर्यटन तथा वातावरण मन्त्री भएका थिए ।
सुनसरी क्षेत्र नम्बर ४ मा यसपटकको निर्वाचनमा कार्कीलाई कुशियैत र स्वतन्त्र उम्मेदवारले कडा चुनौती दिने स्थानीय बताउँछन् । क्षेत्र नम्बर ४ मा प्रतिनिधिसभा सदस्य पदको लागि नेपाली काङ्ग्रेसका उम्मेदवार कार्कीले मनोनयन दर्ता गराएका छन् । नेकपा (एमाले)बाट कुशियैतको उम्मेदवारी रहेको छ ।
