इनरुवा । आसन्न मङ्सिर ४ गतेको निर्वाचनमा सुनसरीमा स्वतन्त्र उम्मेदवारी दिनेको सङ्ख्या अत्यधिक देखिएको छ ।
निर्वाचन अधिकृतको कार्यालयहरूले सार्वजनिक गरेको उम्मेदवारको अन्तिम नामावलीको सूचीअनुसार प्रतिनिधिसभा सदस्यतर्फ सुनसरीका ४ निर्वाचन क्षेत्रमा ९४ जनाको उम्मेदवारी कायम भएको छ । जसमा स्वतन्त्र उम्मेदवारको सङ्ख्या ४५ रहेको छ ।
यस्तै आठवटा प्रदेशसभा सदस्य पदका लागि जम्मा १ सय ११ जनाको उम्मेदवारी कायम रहेको छ । जसमा ५३ जना स्वतन्त्र उम्मेदवार रहेका छन् ।
क्षेत्रगत रूपमा क्षेत्र नम्बर १ मा प्रतिनिधिसभाका लागि २० जनाको उम्मेदवारी कायम रहेको छ । जसमा ११ जना स्वतन्त्र उम्मेदवार रहेका छन् ।
सोही क्षेत्रको प्रदेश सभा (क) तर्फ १४ जनाको उम्मेदवारी पर्दा ७ जना स्वतन्त्र उम्मेदवार रहेका छन् । त्यस्तै प्रदेशसभा (ख) तर्फ १३ जनाको उम्मेदवारी पर्दा ७ जना स्वतन्त्र उम्मेदवार रहेका छन् ।
त्यसैगरी सुनसरी क्षेत्र नम्बर २ को प्रतिनिधिसभा सदस्यतर्फ २७ जनाको उम्मेदवारी कायम रहेको छ । जसमा ११ जना स्वतन्त्र रहेका छन् ।
सोही निर्वाचन क्षेत्रको प्रदेशसभाको (क) तर्फ १८ जनाको उम्मेदवारी परेकोमा १० जना स्वतन्त्र रहेका छन् । त्यस्तै (ख) तर्फ १० जनाको उम्मेदवारी कायम रहँदा २ जना स्वतन्त्र उम्मेदवार रहेका छन् ।
त्यस्तै क्षेत्र नम्बर ३ को प्रतिनिधिसभा सदस्यतर्फ २२ जनाको उम्मेदवारी कायम रहेको छ । जसमा ११ जना स्वतन्त्र उम्मेदवार छन् । सोही निर्वाचन क्षेत्रको प्रदेशसभा (क) तर्फ १३ जनाको उम्मेदवारी कायम रहँदा ३ जना स्वतन्त्र उम्मेदवार छन् भने (ख) तर्फ १७ जनाको उम्मेदवारी कायम रहँदा ७ जना स्वतन्त्र रहेका छन् ।
त्यसैगरी क्षेत्र नम्बर ४ को प्रतिनिधिसभा सदस्यतर्फ २५ जनाको उम्मेदवारी कायम रहँदा १२ जना स्वतन्त्र उम्मेदवार रहेका छन् । सो क्षेत्रको प्रदेशसभा (क) तर्फ १३ जनाको उम्मेदवारी कायम रहँदा ३ जना स्वतन्त्र उम्मेदवार छन् । त्यस्तै (ख) तर्फ १३ जनाको उम्मेदवारी कायम रहँदा ४ जना स्वतन्त्र उम्मेदवार रहेका छन् । यसैबीच निर्वाचन कार्यालयले सम्बन्धित उम्मेदवारहरूलाई निर्वाचन चिह्नसमेत प्रदान गरेको छ ।
स्वतन्त्रतर्फका उम्मेदवारमध्ये सुनसरी ४ को प्रत्यक्षतर्फ खालिद हुसेन हकको उम्मेदवारीलाई चासोका रूपमा हेरिएको छ । सुनसरी ४ को प्रत्यक्षतर्फ खालिदसँगै सरकारका प्रवक्तासमेत रहेका काङ्ग्रेस नेता ज्ञानेन्द्रबहादुर कार्की र एमालेका नेता जगदीशप्रसाद कुसियत प्रतिस्पर्धामा छन् ।
खालिद जसपा सुनसरीको अग्रज नेता हुन् । टिकट वितरणप्रति असन्तुष्टि जनाउँदै उनले सो क्षेत्रबाट स्वतन्त्र उम्मेदवारी दर्ता गराएका छन् ।
