धरान । सुनसरी क्षेत्र नम्बर १ मा पूर्व धरान नगर प्रमुख मनोजकुमार मेन्याङ्बोले उम्मेदवारी फिर्ता नलिएसँगै रोचक प्रतिस्पर्धा हुने भएको छ ।
नेकपा (एमाले)बाट बागी उम्मेदवार बनेका उनले चुनाव चिह्न खरायो पाएका छन् । प्रतिनिधिसभाको टिकट वितरणमा पार्टीले गलत निर्णय गरेको भन्दै पार्टीबाट विद्रोह गरी पार्टी परित्याग गर्दै उम्मेदवारी दिएका थिए । उम्मेदवारी दिए पनि फिर्ता हुने अनुमान गरिएको भए पनि बुधबारसम्म फिर्ता नलिएपछि चुनावी भिडन्त रोचक हुने भएको हो ।
सुनसरी १ मा प्रतिनिधिसभामा नेकपा एमालेसँगको गठबन्धनबाट जनता समाजवादी पार्टीका सङ्घीय अध्यक्ष अशोक राई उम्मेदवार छन् । सत्तारुढ गठबन्धनबाट माओवादी केन्द्रका मुक्सामहाङ मेन्याङ्बो छन् । त्यस्तै अर्का स्वतन्त्रका रूपमा नेपाल बसोवास बस्ती संरक्षण समाजका केन्द्रीय अध्यक्ष कुमार कार्की छन् । उनको चुनाव चिह्न घण्टाघर परेको छ । सुनसरी १ मा कसले जित्ने भन्ने अन्यौलता खडा भएको छ ।
एमालेका एक नेताका अनुसार मेन्याङ्बोको बागी उम्मेदवारीसँगै कसले जित्ला भनेर आकलन गर्न नसकिने स्थिति बनेको छ । कम्युनिष्टको गढ मानिए पनि पछिल्ला दुई स्थानीय तहको निर्वाचनमा हार बेहोरेका कारणले पनि एमालेले जसपालाई टिकट दिएको अनुमान गर्ने नेताहरू पनि छन् ।
यसअगि त्रिपक्षीय भिडन्त हुने अनुमान गरिएको थियो किनकि एमालेले प्रतिनिधिसभा सदस्य जयकुमार राईको एकल नाम सिफारिस गरेको थियो । यता जसपाबाट अशोक राई उठ्ने निश्चित थियो भने सत्तारुढ गठबन्धनमा चाहिँ अन्यौलता रहेको थियो । स्थानीय तहको निर्वाचन सकिएलगत्तै नेपाल बसोवास बस्ती संरक्षण समाजका अध्यक्ष कार्कीले स्वतन्त्रमा उम्मेदवारी दिने घोषणा गरिसकेका थिए । सुकुम्वासीमाझ लोकप्रिय मानिएका कार्कीको पनि राम्रै सम्भावना रहेको मानिन्छ ।
तर, अब भने चुनावी प्रतिस्पर्धा फरक कोणबाट हुने भएको छ । चारजनाको कडा प्रतिस्पर्धाका बावजुद कसले बाजी मार्ने हो भन्न गाह्रो भएको केही नेताहरू बताउँछन् ।
