बेलबारी । भारतको विहार वर्गीनीया घर भएका ब्रमदेव पासवान विगत दश वर्ष देखी नेपालका विभिन्न भागमा पुराना कागज तथा धातुजन्य कवाडी समान सङ्कलन गरी रहेका छन् । फोहोरबाट मोहोर कमाउन पासवान जस्तै हजारौँ भारतीय नागरिकको कवाडी सामान सङ्कलनको आकर्षक गन्तव्य नेपाल बनेको छ ।
नेपालीको रोजाइमा पर्न नसकेको कवाडी सामानको कारोबार भारतीयको भने यही व्यवसाय रोजाइमा परेको छ । मोरङको सुन्दरहरैंचा नगरपालिका क्षेत्र भित्र मात्रै दर्जन भन्दा धेरै कवाडी सङ्कलन केन्द्र रहेका छन् । जसमध्ये सुनसरी इनरुवाका सञ्जय चौधरीको आरके कवाडी पसल रहेको छ । जसमा छ जना भारतीय मजदुर रहेका छन् ।
उक्त कवाडी पसलका व्यवस्थापक पनि भारत विहारकैं समि जैस्वाल रहेका छन् । उनका अनुसार सङ्कलक मजदुरहरूले गाउँ सहरका विभिन्न भागमा सङ्कलन गरी ल्याएको कागज प्रति किलो २० रुपैयाँ, धातुजन्य सामान प्रति किलो ५५ रुपैयाँको दरले, गाडीका पुराना टायर दुई सय देखी पाँच सय सम्म र सिसाको बोतल प्रति गोटा डेढ देखी दुई रुपैयाँ सम्ममा खरिद गर्ने गरेको बताउँछन् । यस्ता सामाग्री उद्योगमा पुर्याएर प्रशोधन गरी पुनः प्रयोगमा ल्याइन्छ ।
गाँउगाँउमा गएर पुराना सामान सङ्कलन गर्ने व्यक्तिहरू नेपालमा पाउनै मुस्किल भएको जैस्वाल बताउँछन् । राम्रो आम्दानी भएता पनि यो पेसामा नेपालीको आकर्षण देखिँदैन । भारत विहार घर भएका राकेश जैस्वालका अनुसार बिहानै देखी राम्ररी साइकलमा गाउँ घुम्दा पन्ध्र सय देखी पच्चिस सय सम्म आम्दानी हुने बताउँछन् । नेपालमा आएर यो पेसा अङ्गालेकै कारण भारतमा आफ्नो परिवार चलेको जैस्वाल बताउँछन् ।
