विराटनगर । आगामी मङ्सिर ४ गते हुन लागेको सङ्घ र प्रदेशतर्फको निर्वाचनमाा १८ पदको लागि मोरङमा २ सय २६ जनाले उम्मेदवारी दर्ता गराएका छन् ।
सङ्घमा १ सय ८ र प्रदेशतर्फ १ सय १८ जना उम्मेदवारले आइतबार ६ वटा निर्वाचन अधिकृतको कार्यालयमा पुगेर उम्मेदवारी दर्ता गराएका हुन् । मोरङका ६ वटा सङ्घीय र १२ प्रदेश निर्वाचन क्षेत्र छन् ।
मोरङ क्षेत्र नं. १ को प्रतिनिधिसभा सदस्य पदमा १५ जनाको उम्मेदवारी परेको क्षेत्र नं. १ का निर्वाचन अधिकृत गोपालप्रसाद थापाले जानकारी दिए । सोही निर्वाचन क्षेत्रको ‘क’ मा ७ र ‘ख’ मा ८ जनाको उम्मेदवारी परेको छ ।
क्षेत्र नं. १ मा प्रतिनिधिसभा सदस्य पदमा नेकपा (एमाले)बाट निवर्तमान सांसद् घनश्याम खतिवडाले उम्मेदवारी दिएका छन् । गठबन्धनबाट काङ्ग्रेसका डिकबहादुर लिम्बू रहेका छन् । यस्तै राष्ट्रिय स्वतन्त्र पार्टीबाट कमलबहादुर श्रेष्ठ, स्वतन्त्रबाट तिलकबहादुर मगर, राप्रपाबाट होमनाथ गौतम, स्वतन्त्रबाट मनिषा सुवेदीलगायतले प्रतिनिधिसभा सदस्यमा उम्मेदवारी दर्ता गराएका छन् । यस निर्वाचन क्षेत्रमा एमाले र गठबन्धनबाट उम्मेदवारी दिएका काङ्ग्रेसका लिम्बूबीच प्रतिस्पर्धा हुने देखिएको छ । २०७४ सालको निर्वाचनमा पनि लिम्बू र खतिवडा चुनावी मैदानमा उत्रिएका थिए । त्यस बेलाको निर्वाचनमा एमालेका खतिवडाले काङ्ग्रेसका उम्मेदवार लिम्बूलाई पराजित गरेका थिए ।
प्रदेश १ को ‘क’ मा गठबन्धनबाट माओवादी केन्द्रमा कुलबहादुर साम्बा र एमालेबाट उमाकान्त गौतमले उम्मेदवारी दिएका छन् । माओवादीबाट उम्मेदवारी दिएका साम्बा निवर्तमान प्रदेश सांसद् हुन् । यस्तै स्वतन्त्रबाट फुलकुमारी पण्डित राई, राप्रपाबाट पूर्णबहादुर तामाङले प्रदेशमा उम्मेदवारी दिएका छन् ।
सोही निर्वाचन क्षेत्रको ‘ख’ मा गठबन्धनबाट एकीकृत समाजवादी पार्टीबाट उपेन्द्र घिमिरे र एमालेबाट खड्गबहादुर बस्नेतले उम्मेदवारी दिएका छन् । घिमिरे प्रदेश १ का यातायात तथा सञ्चार मन्त्री हुन् । यस्तै स्वतन्त्रबाट दीपक राई, डिल्लीराम शर्मा अधिकारीलगायतले उम्मेदवारी दिएका छन् ।
क्षेत्र नं. २ मा ३४ जनाको उम्मेदवारी परेको छ । निर्वाचन अधिकृत नरेन्द्र केशरी पोखरेलका अनुसार प्रतिनिधिसभा सदस्यमा १३, प्रदेश ‘क’ मा १२ र ‘ख’ मा ९ जनाको उम्मेदवारी परेको हो ।
प्रतिनिधिसभा सदस्यमा गठबन्धनबाट काङ्ग्रेसकी सुजता कोइरालाले उम्मेदवारी दिएकी छन् । एमालेबाट ऋषिकेश पोखरेलले उम्मेदवारी दर्ता गराएका हुन् । यसैगरी नेपाल किसान पार्टीबाट सुरेश कुर्वा, हाम्रो नेपाली पार्टीबाट विनोदमणि भट्टराई, राप्रपाबाट गोपाल दाहाल, लोसपाबाट नारायणप्रसाद गनगाईं, स्वतन्त्रबाट विश्वेश्वर ऋषिदेवलगायतले प्रतिनिधिसभा सदस्यमा उम्मेदवारी दर्ता गराएका छन् ।
यसैगरी प्रदेश ‘क’ मा गठबन्धनबाट नेकपा (माओवादी केन्द्र)बाट गणेश उप्रेती (सुशील) ले उम्मेदवारी दिएका छन् । एमालेबाट दानबहादुर कार्की, स्वतन्त्रबाट शमसेरबहादुर कार्की, फडिन्द्र थापा, राजेन्द्र शर्मालगायतले पनि प्रदेश ‘क’ मा उम्मेदवारी दिएका छन् ।
सोही निर्वाचन क्षेत्रको ‘ख’ मा गठबन्धनबाट काङ्ग्रेसका विनोद कार्की र एमालेबाट लीलावल्भव अधिकारीले उम्मेदवारी दिएका छन् । यस्तै स्वतन्त्रबाट विष्णुबहादुर थापा, मो. कमुल मियाँलगायतले पनि प्रदेशतर्फ उम्मेदवारी दिएका छन् ।
क्षेत्र नं. ३ मा सङ्घ र प्रदेशमा गरी ५३ जनाले उम्मेदवारी दर्ता गराएका छन् । प्रतिनिधिसभा सदस्यमा ३१, प्रदेश ‘क’ मा ७ र ‘ख’ मा १५ जनाले उम्मेदवारी दर्ता गराएको निर्वाचन अधिकृत रामहरि शर्मा काफ्लेले जानकारी दिए ।
सङ्घमा गठबन्धनबाट काङ्ग्रेसका सुनिल शर्मा र एमालेबाट भानुभक्त ढकालले उम्मेदवारी दर्ता गराएका छन् । राष्ट्रिय प्रजातन्त्र पार्टी (राप्रपा) बाट रेखा थापाले पनि उम्मेदवारी दिएकी छन् ।
प्रदेश ‘क’ मा गठबन्धनबाट काङ्ग्रेसका शेखरचन्द्र थापाले उम्मेदवारी दिएका छन् । एमालेबाट दिलिपकुमार राईले उम्मेदवारी दर्ता गराएका छन् । थापा प्रदेश १ मा वन तथा वातावरण मन्त्री हुन् भने राई पथरीशनिश्चिरे नगरपालिकाको निवर्तमान नगर प्रमुख हुन् । यस्तै राप्रपाबाट तीर्थबहादुर गुरुङ, स्वतन्त्रबाट धनबहादुर कार्कीलगायतले प्रदेशमा उम्मेदवारी दिएका छन् ।
यस्तै सोही निर्वाचन क्षेत्रको ‘ख’ मा एमालेबाट ज्ञानेन्द्र सुवेदी र गठबन्धनबाट एकीकृत समाजवादी पार्टीका लक्ष्मीकुमार श्रेष्ठले उम्मेदवारी दिएका छन् । सुवेदी बेलबारी नगरपालिकाका निवर्तमान नगरप्रमुख हुन् भने श्रेष्ठ सुकुना स्कुलका पूर्व प्रधानाध्यापक हुन् । यस्तै राप्रपाबाट रमेश रिजाल, स्वतन्त्रबाट यामकुमार श्रेष्ठलगायतले प्रदेशमा उम्मेदवारी दिएका छन् ।
क्षेत्र नं. ४ मा सङ्घ र प्रदेश गरी ३४ जनाले उम्मेदवारी दर्ता गराएका छन् । निर्वाचन अधिकृत मणिराज पोखरेलका अनुसार सङ्घमा १७, प्रदेश ‘क’ मा ७ र ‘ख’ मा १० जनाले उम्मेदवारी दर्ता गराएको जानकारी गराएका हुन् ।
प्रतिनिधिसभा सदस्यमा गठबन्धनबाट माओवादी केन्द्रका अमनलाल मोदीले उम्मेदवारी दर्ता गराएका छन् । एमालेबाट विनोद ढकालले उम्मेदवारी दिएका छन् । मोदी निवर्तमान सांसद् हुन् भने ढकाल एमालेका केन्द्रीय सदस्य हुन् । २०७४ सालको निर्वाचनमा मोदीले नेपाली काङ्ग्रेसका नेता महेश आचार्यलाई पराजित गरी यस क्षेत्रबाट निर्वाचित भएका थिए । यस पटक काङ्ग्रेस, माओवादी र एकीकृत समाजवादीको गठबन्धन रहेको छ ।
क्षेत्र नं. ४ मा राष्ट्रिय स्वतन्त्र पार्टीका नेत्रप्रसाद शिवाकोटी, स्वतन्त्रबाट महेश नेपाल, गोकुलप्रसाद पोखरेल, लोसपाबाट लक्ष्मण साह, राप्रपाबाट रवि रिजाल, नेमकिपाबाट श्यामबहादुर दर्जी, नेपाली काङ्ग्रेस बीपीबाट अशोक पौडेलले सङ्घमा उम्मेदवारी दिएका छन् ।
प्रदेश ‘क’ मा गठबन्धनबाट काङ्ग्रेसका गुरुराज घिमिरे र एमालेबाट जयप्रसाद चौधरीले उम्मेदवारी दिएका छन् । यस्तै राप्रपाबाट आशनारायण थारु, लोसपाबाट हेमन्तीकुमार सरदार, स्वतन्त्रबाट प्रधुमन चौधरी, नेपाली काङ्ग्रेस बीपीबाट श्यामकुमार चौधरीले प्रदेशमा उम्मेदवारी दिएका छन् ।
सोही निर्वाचन क्षेत्रको ‘ख’ मा गठबन्धनबाट काङ्ग्रेसका भीम पराजुलीले उम्मेदवारी दिएका छन् । क्षेत्र नं. ४ ‘ख’ गठबन्धनमा काङ्ग्रेसको भागमा परेको थियो । तर, यस निर्वाचन क्षेत्रमा एकीकृत समाजवादीका नेता महेश रेग्मीले पनि प्रदेशमा उम्मेदवारी दर्ता गराएका छन् । एमालेबाट जीवन घिमिरेले उम्मेदवारी दिएका छन् । सत्तारुढ गठबन्धन छाडेर नेकपा (एमाले)सँग चुनाबी तालमेल गरेको जनता समाजवादी पार्टीलाई नेकपा (एमाले)ले धोका दिएको छ ।
एमालेले जसपाको भागमा परेको मोरङको २ वटा प्रदेशसभा निर्वाचन क्षेत्रमा आफ्नै उम्मेदवारी दिएको हो । ४ ‘ख’ मा जसपाबाट सञ्जयकुमार सिंह राजपुतले पनि उम्मेदवारी दिएका छन् । यस्तै राप्रपाबाट माधवप्रसाद आचार्य, स्वतन्त्रबाट पशुपतिकुमार माझी, भीमबहादुर राजवंशीलगायतले प्रदेशमा उम्मेदवारी दिएका छन् ।
प्रदेशसभामा उम्मेदवारी दिएका काङ्ग्रेसका पराजुली विराटनगर महानगरपालिकाका निवर्तमान नगर प्रमुख हुन् । यस्तै एमालेका उम्मेदवार घिमिरे पूर्व सामाजिक विकास मन्त्री हुन् भने रेग्मी एकीकृत समाजवादी पार्टीको पोलिट ब्यूरो सदस्य हुन् ।
क्षेत्र नं. ५ मा ३२ जनाको उम्मेदवारी परेको छ । सङ्घमा १६, प्रदेश ‘क’ मा ६ र ‘ख’ मा १० जनाले उम्मेदवारी दर्ता गराएको निर्वाचन अधिकृत गणेश नायकले जानकारी दिए ।
सङ्घमा गठबन्धनबाट माओवादी केन्द्रका शिवकुमार मण्डल र जसपाबाट राजकुमार यादवले उम्मेदवारी दिएका छन् । एमालेका योगेन्द्र मण्डलले बागी उम्मेदवारी दर्ता गराएका छन् । मण्डलले स्वतन्त्र उम्मेदवारी दर्ता गराएका हुन् । एमाले र जसपाबीच गठबन्धन भएको कारणले मण्डलले टिकट नपाएपछि स्वतन्त्र उम्मेदवारी दिएका हुन् ।
प्रदेश ‘क’ मा गठबन्धनबाट काङ्ग्रेसका गयानन्द मण्डल र एमालेका सन्तोषकुमार साहले उम्मेदवारी दर्ता गराएका छन् । यस्तै राप्रपाबाट सोनलकुमार गुप्ता, स्तवन्त्रबाट रूपेशकुमार मण्डल, कलानन्द साहलगायतले प्रदेशमा उम्मेदवारी दर्ता गराएका छन् ।
यस्तै प्रदेश ‘ख’ मा गठबन्धनबाट काङ्ग्रेसका अमृत आर्याल र जसपाबाट जयराम यादवले उम्मेदवारी दिएका छन् । अर्याल काङ्ग्रेसका केन्द्रीय सदस्य हुन् भने यादव प्रदेश १ का स्वास्थ्य मन्त्री हुन् । यस्तै एमालेबाट निवर्तमान प्रदेश सांसद् वसन्तीदेवी यादवले हाम्रो नेपाली पार्टीबाट उम्मेदवारी दर्ता गराएकी छन् । एमालेले जसपासँग गठबन्धन गरेकाले टिकट नपाउने भएपछि उनले प्रदेशमा उम्मेदवारी दिएकी हुन् । स्वतन्त्रबाट भूराज राईले पनि प्रदेशमा उम्मेदवारी दिएका छन् ।
क्षेत्र नं. ६ मा ४३ जनाको उम्मेदवारी परेको छ । सङ्घमा १६, प्रदेश ‘क’ मा १३ र ‘ख’ मा १४ जनाले उम्मेदवारी दर्ता गराएको मुख्य निर्वाचन अधिकृतको कार्यालयका सूचना अधिकारी हेमबहादुर बुढाथोकीले जानकारी दिए ।
सङ्घमा गठबन्धनबाट काङ्ग्रेसका प्रभावशाली नेता शेखर कोइराला र एमालेबाट लालबावु पण्डितले उम्मेदवारी दिएका छन् । राप्रपाबाट गोपाल कटुवाल क्षेत्री, स्वतन्त्रबाट सरोज नेपाल, लक्ष्मी थेबेलगायतले उम्मेदवारी दिएका छन् ।
प्रदेश ‘क’ मा गठबन्धनबाट माओवादी केन्द्रका जीवन आचार्य र एमालेबाट रीता न्यौपानेले उम्मेदवारी दर्ता गराएकी छन् । प्रदेश ‘ख’ बाट गठबन्धनबाट काङ्ग्रेसका केदार कार्कीले उम्मेदवारी दिएका छन् । एमालेबाट पर्शुराम बस्नेतले उम्मेदवारी दर्ता गराएका छन् । जसबाट प्रदेशमा राजेन्द्रप्रसाद गुप्ताले उम्मेदवारी दर्ता गराएका छन् ।
