बिर्तामोड । प्रदेश कमिटी सदस्यमा उम्मेद्वारी दिने आकांक्षा राखेका झापाको अर्जुनधारा नगरपालिकाका पुर्व मेयर तथा नेकपा एमाले प्रदेश कमिटी सदस्य हरिकुमार राना सत्तारुढ गठबन्धनबाट प्रतिनिधिसभा सदस्यको उम्मेद्वार बनेका छन् ।
नेकपा एमालेले अन्तिम समयमा रानाको नाम हटाएपछि सत्तारुढ गठबन्धनको सहयोगमा उनी उम्मेद्वार बन्ने भएका हुन् । उनले शनिबार नै एमालेका सबै जिम्मेवारीबाट अलग भएको घोषणा गरेका छन् । राना ४० बर्षदेखि नेकपा एमालेमा आवद्ध थिए ।
यसअघि २ पटक तत्कालिन शनिश्चरे गाविसका अध्यक्ष भइसकेका राना अर्जुनधारा नगरपालिकाका संस्थापक मेयर हुन् । उनले पार्टीमा प्रदेश कमिटी सदस्यको उम्मेद्वार बन्ने घोषणा गरेका थिए । पार्टीको स्थानीय कमिटीले उनलाई झापा क्षेत्र नम्बर २ को ‘ख’ मा उम्मेद्वार बन्नका लागि १ नम्बरमा नाम राखेर सिफारिस गरेको थियो । अन्तिम अवस्थामा आफ्नो नाम काटिएपछि रुष्ट बनेका रानाले एमाले परित्याग गर्दै सत्तारुढ गठबन्धनबाट उम्मेद्वार बन्ने निर्णय गरेका हुन् ।
उम्मेद्वारी दर्ता गर्दै रानाले नेपाली कांग्रेस, नेकपा माओवादी केन्द्र, नेकपा एकिकृत समाजवादी, लोकतान्त्रिक समाजवादी पार्टी र जनमोर्चाको साझा समर्थन आफुलाई रहेको बताए । उनले नेकपा माओवादी केन्द्रको चुनाव चिन्हबाट निर्वाचनमा सहभागि हुने समेत बताए । सिफारिसमा परेका मध्ये अध्यक्ष केपी ओलीले एमाले प्रदेश कमिटी सदस्य चिन्तन पाठकलाई रोजेपछि रानाले राजनीतिक धार परिवर्तन गरेका हुन् ।
एमालेको स्थानीय राजनीतिमा बलियो पकड राख्ने रानाको पार्टी परित्यागले झापाको राजनीतिमा तरंग पैदा भएको छ । यसअघि माओवादी नेतृ धर्मशीला चापागाँई उम्मेद्वार बन्ने टुङगो हुँदा असहमत रहेका कांग्रेसका मतदाता रानाको उपस्थितीले नतिजा आफ्नो पक्षमा पार्न सक्ने बिश्लेषण गर्न थालेका छन् । उनीहरुले गठबन्धनको जित सम्मुखमा रहेको भन्दै अब चुनावी प्रचारमा सक्रिय रुपले लाग्ने बताएका छन् ।
