विजयपुर । स्थानीय र प्रहरीले आफ्नो छोरालाई कुटपिट गरी घाइते बनाएको भन्दै धरान–१५ पुष्पलाल मार्गका पुष्प गुरुङले प्रहरीविरुद्ध नै जाहेरी गरेका छन् । तर, उनको जाहेरी इलाका कार्यालय धरानले दर्ता गरेको छैन ।
शुक्रबार गुरुङ इलाका मातहतको अस्थायी प्रहरी पोष्ट वरगाछीका इन्चार्जसमेत रहेका सहायक प्रहरी हवल्दार रामविलास राजवंशी र प्रहरी अनिल बस्नेत तथा स्थानीय धरान–८ का तुला श्रेष्ठविरुद्ध उजुरी दिन इलाका प्रहरी कार्यालय पुगेका थिए ।
मङ्गलबार तुला श्रेष्ठको धरान–८ गुराँस चोकको ग्रिलमा चोरी भएको थियो । उनले १४ हजार रुपैयाँ प्रतिगोटा पर्ने २ वटा ड्रिल मेसिन चोरी भएको बताए । श्रेष्ठका अनुसार छिमेकी चौकीदारको ३ सय रुपैयाँसहित पाइन्ट हरायो । चोरी भएको सामान भोलिपल्ट नजिकै भेटिएपछि चोर सामान लिन आउँछ भनेर चौकीदार बसेको तुलारामले बताए । बुधबार राति करिब साढे १२ बजे पुष्पका छोरा २५ वर्षीय प्रवीण गुरुङ हिँड्दै गुराँस चोकतिर आएका थिए । चोकतिर आउँदै गरेको बेला कुनै आधार प्रमाणविना गुरुङले नै चोरी गरेको आशङ्कामा उनीमाथि कुटपिट भएको थियो ।
कुटपिटकै कारणले मुखबाट रगतसमेत आएको प्रवीणका बुबा पुष्पले बताए । ग्रिल सञ्चालक श्रेष्ठले सुरुमा आफूहरूले कुटपिट नगरेको दाबी गरे पनि पछि एक–दुई झापट लगाएको स्वीकार गरे । पुष्पका अनुसार प्रवीण सुस्तमनस्थितिका छन् । उनलाई ग्रिल सञ्चालक श्रेष्ठसहितले कुटपिट गरी अस्थायी प्रहरी पोष्ट वरागाछीमा जिम्मा लगाएका थिए । ग्रिल सञ्चालक श्रेष्ठले भने, ‘सामान्य एक–दुई झापट लगाएको हो । त्यस्तो साह्रो कुटेको होइन ।’
अस्थायी प्रहरी पोष्टका इन्चार्ज सहायक प्रहरी हवल्दार राजवंशी र प्रहरी बस्नेतले चोरी भएको हो कि होइन र प्रवीणले नै चोरेको हो कि होइन अनुसन्धान नै नगरी मरणासन्न हुने गरी कुटपिट गरेको प्रवीणका बुबा पुष्पको दाबी छ । उनले भने, ‘प्रहरीले अनुसन्धान गर्र्ने कि मर्नेगरी कुटपिट गर्ने ?’ गुरुङले चोरी कसले गरेको भन्ने विषयमा सिसिटिभी फुटेज हेरेर चोर पहिचान गर्न सकिने भए पनि त्यतातिर ध्यान नदिइएको बताए ।
छोरालाई कुटपिट गरी घाइते बनाएपछि रातको करिब १ बजे हत्कडी लगाएर घरमा ल्याएको उनले बताए । राति नै प्रहरीले घर खानतलासी गरेको उनले बताए । कुटपिट गरिएका प्रवीणको शरीरभरि निलडाम छ । उनले छोरालाई उद्धृत गर्दै दुवै प्रहरीले पन्ध्र–पन्ध्र पटक पैंताला र जिउमा कुटपिट गरेको जानकारी दिए । उनले भने, ‘खुट्टामाथि सुन्निएको छ । छोराविरुद्ध जाहेरी पनि परेको छैन । उपचारका लागि अस्पताल लैजान लागेको थिएँ तर, प्रहरीले अस्पतालसमेत लान नदिई पक्राउ गरेर लग्यो ।’
यता इलाका प्रहरी कार्यालय धरानका इन्स्पेक्टर सागर श्रेष्ठले चोरीको आरोप लगाउनेहरूले मौखिक उजुरी दिएको बताए । ‘प्रहरीले आरोप लागेर अनुसन्धानमा रहेको बेला कुट्न मिल्छ कि मिल्दैन ?’ भन्ने सञ्चारकर्मीको जिज्ञासामा उनले भने, ‘तपाईंहरू सूचना लिन आउनुभएको कि विवाद गर्न ?’
उनले आरोपित प्रहरी पनि अनुसन्धानको दायरामा आउने बताए । गुरुङले निर्दोष व्यक्तिलाई कुटपिट गरेकाले न्यायका लागि जाहेरी दिए पनि प्रहरीले दर्ता नगर्दा आफू अन्यायमा परेको बताएका छन् । उनले भने, ‘गल्ती गरेको रहेछ भने सजाय पाओस् । सत्य–तथ्य अनुसन्धान नगरी प्रहरीले नै कुटपिट गर्नाले हामी अन्यायमा प¥यौं ।’ उनले प्रहरीले दोषी नै भए पनि सुरक्षा दिई कानूनी उपचारमा लाग्नुपर्नेमा कुटपिट गरेको बताए ।
गुरुङका अनुसार सहायक प्रहरी हवल्दार राजवंशीले मिडियामा नजान आग्रह गरेका थिए । इलाका प्रहरी कार्यालयका डीएसपी बुद्ध श्रेष्ठले प्रहरी र घटनामा संलग्न सबैलाई पक्राउ गरी अनुन्धान गर्ने बताए । उनले प्रहरीविरुद्धको जाहेरी दर्ता गर्न नमिल्ने बताउँदै भने, ‘प्रहरीविरुद्ध नै जाहेरी दर्ता गरेपछि अनुसन्धान नै गर्नु भएन ।’
उनले प्रवीणलाई स्थानीयले कुटेको हो कि अन्तै कुटाइ खाएर आएको थियो कि ? सबै पक्षबाट अनुसन्धान गरिने बताए । पुष्टि हुने आधार भएपछि मात्र जाहेरी दर्ता गर्ने बताए । उनले जाहेरी दिँदैमा दर्ता गरिहाल्नुपर्छ भन्ने नभएको बताउँदै भने, ‘हदम्याद भएकाले प्रारम्भिक अनुसन्धान गरेर मात्रै दर्ता गर्छौं ।’
