धरान । सुनसरीको धरान र वराहक्षेत्रबाट भारी परिमाणमा ब्राउनसुगरसहित ७ जना पक्राउ परेका छन् ।
धरानबाट ३ ग्राम ब्राउनसुगरसहित दुई जना पक्राउ पर्दा वराहक्षेत्रबाट ७६ ग्राम ४३० मिलिग्रामसहित ५ जना मानिस पक्राउ परेका हुन् । जिल्ला प्रहरी कार्यालय सुनसरीका अनुसार धरान–१० को एक होटलबाट सप्तरी राजविराज नगरपालिका ११ का ३० वर्षीय बर्मदेव चौधरी र धरान–३ का २४ वर्षीय मोहम्मद नुरदिनलाई ब्राउनसुगरसहित पक्राउ गरेको हो । सादा पोसाकमा खटिएका प्रहरीको टोलीले उनीहरूलाई आइतबार पक्राउ गरेको हो ।
त्यस्तै वराहक्षेत्र नगरपालिका–३ बाङ्गे क्षेत्रबाट मोटरसाइकल जाँच गर्दा ६ नम्बर वडाका पुरुषोत्तम मेहतालाई पक्राउ गरिएको हो । उनको साथबाट ४ ग्राम ४३० मिलिग्राम ब्राउनसुगर बरामद गरिएको थियो । प्रदेश १–०२–०४४ प ४५५६ र प्रदेश १–०२–०४२ प ४२२९ नम्बरको मोटरसाइकलमा सवार सोही ठाउँका २९ वर्षीय विशाल बस्नेत, वराहक्षेत्र ९ का २८ वर्षीय पाथे चन्द्रवंशी, २८ वर्षीय यजन्ता माइलालाई नियन्त्रणमा लिइएको हो । उनीहरूलाई लागूऔषध नियन्त्रण ऐन २०३३ अनुसार जिल्ला अदालतबाट ७ दिनको म्याद थप गरी अनुसन्धान भइरहेको जनाइएको छ ।
त्यस्तै उनीहरूले दिएको सूचनाको आधारमा भारत सुपौल जिल्ला थाना वीरपुर बनेलीपट्टि ३ का २५ वर्षीइ रुद्रनारायणकुमार यादवलाई पनि पक्राउ गरिएको छ । उनलाई वराहक्षेत्र ८ शुक्रबारेबाट सोमबार साँझ पक्राउ गर्दा ५२ ग्राम ब्राउनसुगर बरामद गरिएको छ । त्यस्तै बीआर ५० के ०३८६ नम्बरको निलो रङ्गको मोटरसाइकल पनि नियन्त्रणमा लिइएको हो । पक्राउपश्चात् सोधपुछका आधारमा मेहताको घरको कोठाबाट थप १७ ग्राम ब्राउनसुगर बरामद गरिएको हो । उनीहरूको साथबाट कुल ७६ ग्राम ४३० मिलिग्राम ब्राउनसुगर बरामद गरिएको हो ।
