इनरुवा । निषेधाज्ञा खुकुलो बनाइएसँगै बढेको चहलपहलले सुनसरीमा कोरोना संक्रमितकाे संख्या बढाएको छ । निषेधाज्ञा खुकुलो पारिएयता एक साताको अवधिमा सुनसरीमा एक हजार जना संक्रमित थपिएका छन् ।
साउनको दोस्रो सातासम्मको तथ्याङ्क हेर्दा सुनसरीमा १७ सय संक्रमित बढेका छन् ।संक्रमितमध्ये ३६ जनाले ज्यान गुमाएका छन् । संक्रमित थपिँदै जाँदा जिल्लाभित्र कुल संक्रमितको संख्या १३ हजार नाघेको छ । जसमध्ये सक्रिय संक्रमितकाे संख्या २ हजार पुगेको छ ।
सुनसरीमा सबैभन्दा बढी धरानमा कोरोनाका संक्रमित भेटिएका छन् । इटहरीसहित व्यापारिक गन्तव्य मानिने जिल्लाका मुख्य सहर तथा बजार क्षेत्रमा समेत संक्रमण बढ्दो क्रममा देखिएको छ ।
हाटबजार र व्यापारिक केन्द्रमा भीड बढ्दा स्वास्थ्यका मापदण्ड पालना गर्नेको सब्ख्यामा कमी आएको छ । लामा तथा छोटो दूरीका सवारी साधन सञ्चालनमा आएयता समुदायमा संक्रमणकाे जोखिम थप बढेको छ । सुनसरी प्रशासनले जिल्लामा लागू रहने गरी साउन १९ गतेसम्म आंशिक निषेधाज्ञा भने कायम राखेको छ । यद्यपि प्रशासनको उक्त निर्णय भने पालना भएको देखिँदैन । बढ्दो असावधानी
र हेल्चेक्र्याइँका कारण जिल्लामा पुनः सब्क्रमण फैलनेतर्फ सरोकारवाला चिन्तित देखिएका छन् । उनीहरूले स्वास्थ्यका मापदण्डको पालनामा जोड दिन आग्रहगरेका छन् ।
सुनसरीका प्रमुख जिल्ला अधिकारी उमेशकुमार ढकालले बढ्दो असावधानीले जिल्लामा कोरोनाको जोखिम पुनः बढाएको बताए । उनले स्वास्थ्यका मापदण्ड पालनामा सर्वसाधारणले पर्याप्त ध्यान नदिएको बताए ।
ढकालले निषेधाज्ञा खुकुलो भएसँगै बढ्दो भीडले जोखिम बढाएकाले स्वयम् नागरिक सचेत हुनु आवश्यक भएको बताए । प्रजिअ ढकालले सरकारी निर्देशन अनुरूपको जिल्लामा तयारीसमेत थालिएको बताए । तेस्रो लहरको जोखिम बढेकाले सावधानीसँगै पूर्व तयारीमा जोड दिँदै आएको उनले बताए ।
उता जिल्लाभित्र बढ्दो क्रममा देखिएको सब्क्रमण दरलाई स्वास्थ्यकर्मीहरूले भने कोरोनाको तेस्रो लहरको आशंका गरेका छन् । उनीहरूले असावधानी बढेसँगै संक्रमणको संख्यामा दिनानु दिन वृद्धि हुँदै गएको बताएका छन् ।
स्वास्थ्य कार्यालय सुनसरीले बेलैमा सावधानी अपनाउन आवश्यक रहेको भन्दै सोही बमोजिमको तयारी समेत थालिएको जनाएको छ । कार्यालयले उपलब्धताको आधारमा खोप लगाउने क्रमसमेत जारी राखेको जनाएको छ ।
स्वास्थ्य प्रमुख सागर प्रसाईंले निषेधाज्ञाको समयमा घटेको सब्क्रमण दर निषेधाज्ञा खुकुलो भएसँगै बढ्दो क्रममा देखिएकाले चिन्ता बढाएको बताए । उनले बेलैमा सावधानी सहितका उपाय अवलम्बन गरिए जिल्लाको अवस्था छिट्टै भयावह बन्न सक्ने आशंका व्यक्त गरे ।
सुनसरीको धरानमा कोरोनाका संक्रमित बढ्दा बजार पसल खुल्ने समय घटाइएको छ भने इटहरी उपमहानगरपालिका र वडाकार्यालय तत्कालको लागि बन्द गरिएको छ । पछिल्लो एक सातायता बढ्दो संक्रमणलाई आधार मान्दै पालिकाहरूले जोखिम देखिएका क्षेत्रलाई लक (सिल) गर्न थालेका छन् ।
स्वास्थ्यले उपलब्ध गराएको पछिल्लो विवरणअनुसार सुनसरीको इटहरीमा सबैभन्दा बढी ९ सय ५१ सक्रिय संक्रमण छन् । धरानमा ७ सय ४४, वराहक्षेत्रमा ८१, इनरुवामा २८ केस रहेको छ ।
त्यसैगरी सक्रिय संक्रमितमध्ये दुहबीमा २१ जना र रामधुनीमा ४५ जना रहेका छन् । अन्य पालिकामा भने सक्रिय संक्रमितको संख्या दशभन्दा मुनी छ ।
स्वास्थ्य कार्यालयका अनुसार जिल्लाको रेकर्डमा अन्य सक्रिय संक्रमितको सब्ख्या ५२ रहेको छ । जिल्लाभित्र बढ्दो क्रममा देखिएको संक्रमण दरलाई मध्यनजर गर्दै सुनसरी प्रशासनले अवस्था हेरी आवश्यकता अनुसारको निर्णय लिइने जनाएको छ । उसले सम्बन्धित पालिकाले आफू अनुकूलको निर्णयसमेत लिन सक्ने जनाएको छ ।
